الثلاثاء، 29 يناير، 2013

هرتلة الحب العظيمة



تحذير : يمنع من قراءة هذا الموضوع اصحابى المتجوزين والمخطوبين والمرتبطين عموما ..الموضوع للسناجل فقط :)

كنت قاعدة مرة مع "عبس" (هكذا ينادينى اصدقائى دلع بنات بقى :P) بنخلص شوية مسائل مع بعض..وفجأة اتسألت من عبس سؤال:

"هوة ايه السبب ورا شكوى الناس المتكررة إنهم مش لاقيين حب فى الزمن الأغبر دة؟"

الحقيقة اللى بؤمن بيها بعيدا عن الكلام اللى بكتبه فى المدونة هنا "دة أكل عيش يا راجل :)"
ان الحب نهايته الجواز :) يعنى مفيش حب بعد الجواز..
طب ليه؟؟؟
خلينى أقولك دة ببساطة

أصل الرجالة مقسومين نصين : نصهم الأول خاين وعينيه زايغة...
يعنى بعد 10 15 سنة جواز ( فيه سجلوا ارقام قياسية بدرى عن كدة :P ) يبدأوا يبصوا برة...زهقوا بقى من شكل المدام
بيدوروا على بنات صغيرة والاهبل فاكر إنها بتحبه..دى بتحب فلوسك يا أهبل هتحبك على كرشك ولا على قرعتك؟؟ :D

والنص التانى من الرجالة ناس اوفيا ماشاء الله بس زى ما تقول كدة جالهم حالة من الفتور العاطفى..
يعنى تقوله مثلا انت ماعدتش بتقولى كلمة حلوة يقولها كنافة
تقوله انت معدتش بتجيبلى ورد يقولها هوة انا معلقك من على الكورنيش يا ولية وغيرها من التعليقات اللطيفة اللى بتنتهى بيه غالبا الى طوارئ أبو الريش :))
(ومامتى عايزانى أتجوز :D !!!)

أما الستات بقى: يا عينى على الستات
نصهم نكدى ويقرف تجيبلك الغم والهم وأساتذة فى المشاكل ما تفهمش فى ايه يا أخى :))

والنص التانى مفتريين على أجوازهم ودى حقيقة!!:))


يعنى بإختصار شديد اللى انا عايزة أقوله إن الخطأ من الاتنين والحب لا يختفى او يتحول الى كره الا لو اقترن بالإهانة فقط ساعتها بس كل الذكريات الجميلة بتتحول لجحيم!!

مفيش مانع من الراجل من شوية رومانسية من وقت للتانى...خليها مع المناسبات يا سيدى يعنى عيد العمال عيد الجلاء كدة
وانسى بقى عيد جوازكوا عشان  تيجى تبات هنا فى المدونة :))

والستات برضه لازم تفتضل تهتم بنفسها مش عشان اتجوزتى ياختى تبقى اتصادرتى يعنى :))
والراجل كائن سهل ترويضه واشتغاله جدا ولنا فى ذلك لقاء آخر :D

أما عن إجابتى لسؤال عبس:
فالحب الأفلاطونى اللى الناس بتدور عليه عو حب غير موجود اصلاآّ!!!
أحمل ذنب اختلاقه الى الأدب اللى رسم لنا صورة له غير موجودة فى زمانا دة!!

فيه أسطورة بتقول(الحب هو فن توافق النظرات)
دى حقيقة بوافق بيها
اللسان يكدب انما العين لأ

فهو موجود يا اخوانا ولكن مش بالصورة اللى صورتها الروايات والمسلسلات التركى اللى خربت عقول نص بنات مصر :D
ولكن بصورة أكثر حداثة (مع الاسف) تتناسب مع زمن الآى باد والبلاك بيرى والجلاكسى!!

ومازلت عند اضرابى عن الجواز :))
أفضل ان أعيش عمرى كله أكتب عن حب من خيالى نسجه الأدب
ولا انى اتجوز وتضيع صورة الحب العظيمة اللى جوايا فى شوية هرتلة من نظام اجتماعى فاشل :D

هناك 14 تعليقًا:

  1. الموضوع فعلا مش بالوردية اللي بنشوفها في الأفلام بس كلامك فيه مبالغة شوية .. مبالغة كتير :D

    ردحذف
  2. هههههههههه مانا عارف انك عنصرية دي حاجة تانية :P
    بس فعلا انتي مغمقة الموضوع شوية :)

    ردحذف
  3. دة انتوا اللى عايشين فى عالم تانى :D دة حال 3/4 الناس فى مصر ولو وجد غير ذلك فهو حالة شاذة

    ردحذف
  4. معنى كده ان معنى مفيش حب بالشكل اللي احنا متخيلينه (ولو بنسبة قليلة) نهائيا ؟!!

    ردحذف
    الردود
    1. بنسبة قليلة فيه طبعا بس بنسبة قليلة

      حذف
  5. أنا جاية أرخم .. مش أوي يعني :D
    بصي نظريتي الفذة عن الحب والجواز والرغي الكتير ده :D

    عارفة إن مفيش حب أفلاطوني .. ولا في راجل أو امرأة كاملة .. دي حاجات خيالية .. بس في اتنين عاوزين يسعدوا بعض هيقدروا على كده .. ازاي دي مهمتهم هما الأتنين .. زي مانتي موضحتي بالظبط :D

    أما بعد الجواز فالحب مش بيفضل زي ماهو عشان حاجات كتير ومنها الزهق .. بس محدش بياخد باله إنه بيتحول لعشرة .. لمودة .. لحاجة تانية أحلى من الحب نفسه بمراحل .. بس برده محدش بيقدر ده.

    وفي النهاية سأتفق معاكي في إني مش هضيع عمري عشان هرتلة نظام اجتماعي فاشل
    زي ما خالتك اليزابيت مرة قالت " only the deepest love will persuade me into matrimony, and that's why I'll end up an old maid"
    وشكراً :D

    ردحذف
    الردود
    1. صح يا كبير
      والخالة اليزابيث اهى معانا يعنى مايهمناش حد :D

      حذف
  6. رغم ان الموضوع صدمنى بس هو صح وده بيحصل كتييير فعلا :)

    ردحذف
  7. حلو الكلام يا عبس والله وحل المشكله دى فى نظريه الاكتفاء يعنى اكتفى بالى قدامك وارضى بكل حاجه فيه طالما انت الى اخترته لان عمر الانسان مهياخد كل حاجه فى الدنيا لازم ببساطه الطموح الزياده والمبالغهي خلصوا لان الانسان عمره مهيكون احسن حد فى الدنيا عشان ياخد احسن واحده فى الدنيا والعكس
    وخليكى مضربه :::]

    ردحذف
    الردود
    1. طبعا انتى مضربة معايا يا عشعش :D

      حذف
  8. اه يا مى اكيييد :]مش هسيبك لوحدك :]

    ردحذف
  9. El 7ob howa fann tawafoq el nazarat :)) :$ gatna nela f 7azena el hebab :D

    ردحذف
  10. دى كنت قاريتها قبل كدة و حبيتها اوى و خاصة اخر جملتين هاهاهاا كان معكى هايدى بحيرى :p

    ردحذف